John 3

Iesu i Orek tura Nikodimas

1I mel e nenge kaltu asa e Nikodimas, i neng lon foron Farasi. Ma i nenge famfamu ken fan Iudaia. 2I tapiek sing Iesu na wor ma ka tara aragii, “Rabi, ▼

▼‘Rabi’ kamtina le tom fafausum

kemem usum le o nenge tom fafausum ae God i wuun ufu ta uga. Wara le biil i fasih tikas in tel matngan fakileng ae o tel u male God biil i kiis tura.”

3Iesu ka kiliis u aragii, “Tekentu kanaka, ia fas o, biil i fasih tikas in par matanfuntih ke God male biil i pang fuuh sabin.”

4Nikodimas ka diik u aragii, “Male kaltu ka laumet tah, ke arafah in pang fis sabin arae? Biil i fasih in kau fis na bala tina, isi ik pang fis sabin.”

5Ke Iesu ka kiliis u aragii, “Tekentu kanaka, ia fas o, biil i fasih tikas in kau na matanfuntih ke God, male biil i pang fis sabin ini dan ke ini Tanwa Kalkaluu. 6Seh i pang na pununfo i liu ini pununfo sau, ma seh i pang na Tanwa Kalkaluu, i liu ini tanwa. 7Gong o bitit na sanih ia use u le on pang fis sabin. 8Kif i kufkufe una falifuh i ier le in filau lo, o ongen u sau, isau le biil i fasih on usum le i la tingah ma in la uwah. I fasih sabin arae fanu tikii ae ri pang ini Tanwa Kalkaluu.”

9Nikodimas ka diik u aragii, “Arafah in tapiek arae?”

10Iesu ka fas u aragii, “O tom fafausum ken fan Israel, ma arafah, biil o usum na foron tier igii? 11Tekentu kanaka, ia fas o, kemem use sanih kemem usum lo ma kemem ka use fatus tier kemem par u, isau le biil tom gam somangat pes sanih kemem use u. 12Ia ka fas ta gam ini foron tier tina piklinbat, ke biil gam unune lo. Pesu le ian fas gam ini foron tier tina Kukulii, arafah gamen unune lo arae?” 13Biil tom tikas i la tah ubae na Kukulii, isau le Kalalik ken Kaltu sau, i puh tah tinbae na Kukulii. 14Arae sau Moses i sik ta sii una mawe na aunbiing ri kiis na falifuh foes ▼

▼3.14Par Namba 21:8-9

, i fasih sau arae Kalalik ken Kaltu sabin rin sik u una mawe, 15isi fanu tikii ae ri unune lo, rin liu fitliu.

16“God i ier kanaka isi fanu tikii na piklinbat, pesu ka ta ufu i tikii sau e Kalalik kia, isi seh sau i unune lo, biil in to fiu, biil. In liu fitliu. 17God biil i wuun ufu ta ke Kalalik uga na piklinbat isi nagogon fanu, biil. I wuun ufu ke Kalalik isi faliu pes ri. 18Seh i unune lo, biil in kiis na nagogon. Isau le seh ae biil i unune lo, ka kiis tah na nagogon. Wara le biil i unune na asa i tikii sau e Kalalik ke God. 19Kamtinan nagogon kiri i aragii: Malal ka tapiek tah aga na piklinbat, isau le fanu biil ri ier isi malal, biil. Ri lala ier tom isi kubunor, wara le sinangu ri i laulau. 20Foron tom tel sinang laulau, ri ememse malal, ma biil rin la una malal wara le ri sokeh, tarama sinang laulau kiri ka tapiek malal. 21Isau le seh sau i liu ini tekentu in la una malal, isi sanih i tel ta u ini rakrakai ke God, ik tapiek malal.”

Orek an Famalal ke Jon ulo Iesu

22Namih, Iesu turan berberat na fafausum kia, ri ka la una falifuh na Iudaia, ke Iesu ka kiis pes fal e biing tura ri, isi ka baptais fanu aiwa. 23Jon sabin i famam tel bapitaiso na Ainon fatat isi Salim, wara le i fuun e dan lo e falifuh ae, ma fanu fuun ri ka la usuf i, isi ik baptais ri. 24Tier igii i tapiek famu, namih Jon ka kiis na kamkabet. 25Fale berberat na fafausum ke Jon ri ka fakep ini orek turan nenge Iudaia kunan matngan susuh una tapiek kalkaluu na mata God. 26Ke ri ka la usuf Jon ke ri ka fas u aragii, “Rabi, kaltu ae kamu tah tina nenge bulin dan na Ioridan, ae o fafas ta ini, ka tel bapitaiso mang. Ma fanu tikii ri ka famam la usuf i.”

27Jon ka kiliis ri aragii, “Neng e kaltu i fasih sau in kep sanih ae God i ta u sing i tina kukulii. 28Gam tom, gam ka ongen ta u e orek kiak, ae ia fas ta gam le, ‘Ia biil e Mesaia, isau le God i wuun ta iau, isi ian famu sau lo.’ 29Fifin ae in fakekel, i ken kaltu tom ae in telpes u. Ke talan kaltu ae in fakekel, i nene ma ka wongwong isi. Ma i fuun ini laes aunbiing i ongen kinen kaltu ae. Laes ae kiak, ma laes ae ka kuruung tikii liu kiak. 30In laumet lalala ma iak fabiro lalala.

31“Seh i la tina mawe, i laumet lon fanu tikii. Ma seh i la tina piklinbat, i tina piklinbat tom, ma i orek la tom aragii kaltu tina piklinbat. Seh i la tina kukulii i laumet lon fanu tikii. 32I famalal sanih i par ta u ma ka ongen ta u, isau le biil tikas i somangat pes orek an famalal kia. 33Seh i unune na orek an famalal kia, i somangat le God i tekentu kanaka. 34Ier ae God i wuun ufu tah, i use orek la tom ke God, wara le God i ta Tanwa Kalkaluu tom sing i, ma ka kuruung tikii u. 35Tama i ier kanaka isi ke Kalalik, pesu ka ta tikii ta foron tier una lima. 36Seh sau i unune lon Kalalik i mel e liu fitliu, isau le seh ae biil i somangat pes Kalalik, biil in kep liu. Biil. Ngaliaf ke God i kiis tom lo.”